Tuesday, July 24, 2007

خاص بالمدونة : حوار بيني وبين وزير الاتصالات علي الميسنجر

night _ light says :
ازيك ياباشا .. منور الميسنجر والنت كله وانا مش مصدق انك قبلت اضافتي
kamola says :
يلا يا ابني خش في الموضوع علي طول علشان مش فاضي رؤساء الشركات عاوزني
night _ light says :
حاضر ياباشا كنت عاوز استفسر من جنابك علي حكاية الدي اس ال دي
kamola says :
يابني دي اس ال ايه بس اسمه ايه دي اس ال في حرف اليه في الاول انا دارسها كده في جامعة هاجصفيتش جنب كامبريدج علي طول
night _ light says :
ياباشا مش المهم حرف الايه ده المهم دلوقتي الفلوس الكتير اللي هاندفعها دي مش حرام كده
kamola says :
يابني هو ايه اللي حرام حورمت عليك عيشتك ده احنا خفضنالكوا النت ب 45 جنيه مش تمن كيلو لحمة دلوقتي
night _ light says :
ياباشا انا عارف انه بقي ب 45 بس 2 جيجا بس مايكفونيش اعمل اي حاجة علي النت وهابقي متقيد زي الموبيلات كده
kamola says :
حلو اديك جيبت سيرة الموبيلات عاوزك بقي تقولي رئيس شركة الموبيل احسن من رئيس شركة الانترنت في ايه
اشمعني ينت رئيس شركة الموبيل تروح تصيف في هاواي بطيارة خاصة وبنت رئيس شركة الانترنت تروح هاواي بطيارة عادية كده مافيش مبدْ تحقيق العدالة في المجتمع لازم نوازي بيتن احتياجتنا ومتطلباتنا والمتاج في ايدينا
night _ light says :
ياباشا طيب واحنا الناس الغلابة اللي مش عارفة تشرب ميه نظيفة دي احنا مابنقولش نروح هاواي احنا عاوزين ابسط حقوقنا في الحياة
kamola says :
يابني انتوا كده كده مطحونيين ماجتش علي النت يعني خليك كووووووول بقي ده انت لو شوفت بنت رئيس شركة الانترنت هاتقولي خلي النت ب 1000 جنيه علشان خاطر عنيها ااااااااااااه علي عنيها
night _ light says :
والله .... بجد ... موزة يعني ؟؟؟
kamola says :
ماتفكرنيش بقي ...... المهم مش عاوزين نزعلها بقي وخليك روش
night _ light says :
والله انت راجل زي العسل وحاضر انا هاروش وهادفع علشان انتوا مالكوش حق تتعبوا معانا انتوا لازم تعيشوا حياتكوا وانتوا تتقرفوا معانا ليه بس ياريت بقي ترتبلي معاها معاد
________________________________
طبعا ده حوار تخيلي بس المقصود بيه انها لما تلاقيهم بيتكلموا يطلعوك عن الموضوع خالص ويقنعوك بحاجات تانية خالص
يعني عمرو اديب يكلمه يقولوه الشباب حاسين ان النت غالي اوي كده عليهم يقولوه احنا عاوزين نقضي علي الوصلات ياسيدي انت ممكن تقضي عليها بطرق تانية غير انك تغلي الاشتراك ممكن تعمل الانترنت من خلال ال اي بي مثلا انك تعمل رقابه دورية ممن مزود الخدمة يكتشف استخدام اكتر من جهاز سهلة اوي يعني
طبعا الاهداف الحقيقية واضحة اوي والموضوع ده هايخلي الشباب يتجمعوا تاني وهايعودونا علي روح المشاركة
والحملة مستمرة وجابت نتايجها الاوليه وصوتنا وصل للاعلام ومستمرة علشان يوصل لكل الدنيا
وفي افكار كتير في الحملة هانعملها كلنا سوا ان شاء الله
للاستماع لنص الحوار مع السيد ( الدكتوووووور ) طارق كامل مع عمرو اديب
http://rapidshare.com/files/44737158/Audio.wma.html

وللمشاهدة الحية اضغط علي
play


واعتقد ان السيد الوزير مابيستخدمش في النت غير الميسنجر علشان كده هو حسبهالنا 2 جيجا يكفونا نتكلم علي الميسنجر

10 comments:

dalida4ever said...

hehehehehehhe

والله نايس بوست

وياسلام لو اكلمه ده انا مش هاخليله

Mona said...

يا جماعة ابشروا في اتصال تليفوني بالاستاذ عقيل بشير في البيت بيتك صرح بان النظام المحدد دا هيكون بالاضافة للى احنا شغالين عليه و الحمد لله اللي هوا انليميتد يعني احنا زي ماحنا مفيش حاجة هتتغير

ramy said...

ياريت يكون كلامك صح يامني يارب ويكون وهو ينفذ كلامه يارب

Anonymous said...

النت خلاص اتحدد و الكلام واضح و مافيش نظام قديم هيفضل كل الحكاية لو لسة عقدك منتهاش مع شركة النت هتكمل معاهم ب95 بس هتاخد 7 جيجا فى الشهر يعنى ال2 جيجا بتاعة ال45 و بال50 جنية الباقية هتاخد 5 جيجا تانية كلة ضرب على القفا الكلام دة من شركة لينك

Anonymous said...

مافيش حاجة اسمها وصلات بعد كدة لان حتى سرعة ال2 جيجا المفتوح فيها التحميل هتخضع لرقابة و ان ثبت ان فية اكتر من مشارك هيتلغى العقد و يتمنع تركيب نت على نفس خط التليفون غير العقوبة القانونية الهدف من كل دة هو القضاءعلى المدونين و البلوج الى بيهاجم الحكومة

night_light said...

ياجماعه لسه القرارات مش واضحة ولسه في لبس اول لما يبقي في قرارات فعلية وثابته هانبلغكم يبها هنا واحنا مش راضيين نحط خبر الا لما نتأكد منه
المهم دلوقت يان صوتنا وصل وفي تغييرات فعلا بتحصل
تابعونا ان شاء الله هانجيب زي ماودعنا في االاول الاخبار الجديدة وماحدش يوقف الحملة
لان ممكن يكون القصد ان الحملة تقف

ghada said...

المحادثة الساخرة دي فعلا معبرة جدا

Anonymous said...

ايه

طب و الواحد يعمل ايه

يعني نقلع و ننزل الشارع ملط عشان يرتاحوا

حتي النت اللي الواحد بيفك فيه عايزين يحرمونا منه

لا كده كتير

الهوا مزفت وقلنا ماشي

المجاري ضاربة ف العجمي مش مهم
(مننا و رجعتلنا)

الميه مش موجوده ف كذا حته
و ايه يعني يشربوا بيبسي او حتي شويبس

انما النت يحددوا البندوث بتاعه
اهه ده اللي مش ممكن ابدا

الله يرحمك يا عمو جمال

عملت ثورة عشان الاكل و الشرب للغلابة

طب لو كنت موجود دلوقتي كنت عملت ايه؟

ده النت

يالهوي النت حددوه وبفلوسنا يصيفوا

واييييييييييييييييييييييييييييييييه

أشرف حمدي said...

سلكة ايه يا أبو سلكة ؟
الوزير ده فاكرنا داقين عصافير ؟؟؟
احنا حنستهبل ؟
لو الموضوع موضوع وصلات غير شرعية كان ممكن القضاء عليها بتقنيات معينة وفرض عقوبات علي اللي بيعمل كده انما الموضوع يا جماعة هو موضوع تحجييييييييم الانترنت
ده قمع فج وواضح

Anonymous said...

[CENTER][IMG]http://i106.photobucket.com/albums/m243/ammmor1983/no.jpg[/IMG]
[SIZE="7"][COLOR="Red"]لا للانترنت المحدود لاااااااااااااااااااااااااااااااا[/COLOR][/SIZE]
[/CENTER]